عُثمانیہ سلطنَت

سلطنت عثمانیہ، تٲریخی تہٕ بول چال کس طورس پؠٹھ ترک سلطنت کہِ ناوٕ سٟتؠ زاننہٕ یوان اوس اَکھ سامراجی دائرٕہ یُس اناطولیہ مَنٛز مرکوز اوس یم ۱۴ مہِ پیٹھہٕ ۲۰ مہِ صدی کہِ شروعاتس تام جۆنوٗب مشرقی یورپ، مغربی ایشیا تہٕ شمٲلی افریقہ کہِ زیادٕہ تر حصس پؠٹھ حُکُومَت کٔر۔ امہِ علاوٕ کوٛر ۱۶ مہٕ صدی کس شروعاتس تہٕ ۱۸ مہٕ صدی کس شروعاتس درمیان جۆنوٗب مشرقی وسطی یورپک کینٛہہ حصن پؠٹھ تہٕ حُکُومَت۔

سلطنت اُبرے أکِس بیلک یا پراصالتِ پؠٹھ، یٔمٕچ بنیاد شمال مغربی اناطولیہ ہَس مَنٛز ۱۲۹۹ مَنٛز تُرکومان قبٲئلٕکی رہنما عثمان اولن ٲس تھٲومٕژ۔ تٔمؠ سٕنٛدٮ۪و جانشینو کٔر اناطولیہ ہُنٛد زیٛادٕ تر حصہٕ فتح تہٕ ۱۴ مہِ صٔدی ہٕنٛدس وسطس تام پھٔہلِتھ بلقانس مَنٛز، تہٕ کٔرٕن پنٕنؠ لۄکٕٹ سلطنت أکس بین البراعظمی سلطنتس مَنٛز تبدیل۔ عثمانیو کوٚر ۱۴۵۳ ہس مَنٛز مَحمَد دوم سٕندِ ذریعہِ قسطنطنیہ(یس از استانبُل ونان چھِ) کہِ فتح سٟتؠ بایزَنطینی سلطنت ختم، یم عثمانین ہند ایکِس بڑِس علاقائی طاقت کِس طورس پؠٹھ ظہورٕچ نشاندٕہی کٔر۔ سلیمان قانونی (۱۵۲۰–۱۵۴۴) کہِ تحت وٲژ سلطنت پننہِ طاقت، خوشحالی تہٕ سیٲسی ترقی کِس عروجس پؠٹھ۔ ۱۷ مہٕ صدی کس آغازس تام، عثمانیو کٔر ۳۲ہن صوبن تہٕ متعدد جاگیردارن ہنٛز صدارت ، یم وقتس سٟتؠ سٟتؠ یا تہٕ سلطنتس مَنٛز جذب آیہٕ کرنہٕ یا مختلف درجن ہٕنٛز خودمختاری دنہٕ۔قسطنطنیہَس (جدید دورُک استنابل) مَنٛز پننہٕ دارالحکومت تہٕ بحیرہ رومک طاس(انگریزی پٲٹھی Mediterranean) کس اکس اہم حصس پؠٹھ قبضَس سٟتؠ، سلطنت عثمانیہ ٲس اربس تہٕ یورپس درمیان شین صدین تام تعٲملک مرکز۔

ییٚلہِ زَن کہِ یہٕ خیال اوس یوان کرنہٕ زِ سلطنت عثمانیہ ٲس سلیمان قانونی کہِ مرنہٕ پتہٕ زوال کِس دورس مَنٛز دٲخل گمٕژ، جدید تعلیمی اتفاق رائے چھُ یہٕ ظٲہر کران زِ سلطنت روز ۱۸ مہِ صدی کہِ زیادٕہ تر حصس مضبوط معیشت، معاشرٕ تہٕ فوج برقرار تھاوان۔ تاہم، ۱۷۴۰ پیٹھہٕ ۱۴۶۸ تام امُن کس اکس طویل عرصس دوران، عثمانی فوجی نظام گو پننیٚن اہم یورپی حریفن، ہیبسبرگ تہٕ روٗس سلطنتن پتھ۔ نتیجتاً گوو عثمانین ۱۸ مہِ صدی کِس ٲخرس تہٕ ۱۹ مہِ صدی کِس شروعاتس مَنٛز شدید فوجی شکستہٕ ، یمہِ کہِ نتیجس مَنٛز علاقہٕ تہٕ عالمی وقار دۄشوٕنی ہند نقصان گوٛو۔ ایم کٕر اصلاح تہٕ جدیدیت کہِ ایکہِ جامع عملہِ ہٕنز ترغیب یَتھ تنزیمت ونان چِھہ۔ ۱۹ مہٕ صدی دوران، سلطنت عثمانیہ بنییہٕ مزید علاقائی نقصانات برداشت کرنہٕ باوجود، اۆنٛدروٗنی طور پٲٹی واریاہ زیٛادٕ طاقتور تہٕ منظم۔ خاص طورس پؠٹھ بلقانس مَنٛز، یتہٕ واریاہ نییٚہٕ ریاستہٕ ابھرییٚہٕ۔

۱۹ مہٕ صدی کس آخرس مَنٛز، مختلف عثمانی دانشورو کٔر یورپی خطوط سٕتی معاشرس تہٕ سیاستس مزید آزاد بناونٕچ کوشش، یٚیمِک نتیجہٕ ۱۹۰۸ کس ینگ ترک انقلابس(Young Turk revolution) مَنٛز کمیٹی آف یونین اینڈ پروگریس(Committee of Union and Progress )کس قیادتس مَنٛز گیہٕ، یٔمی دٔیٚیم آئینی دور قٲئم کوٚر تہٕ آئینی بادشاہتَس تحت مسابقتی کثیر جماعتی انتخابات متعارف کٔری۔ تاہم، تباہ کُن بلقان جَنٛگو پتہٕ، سی یو پی بنیو تیزی سان بنیاد پرست تہٕ قوم پرست، ۱۹۱۳ مَنٛز کٔر بغاوت ہنٕٛزِ قیادت یٔمی اَکھ جماعتی حکومت قٲئم کٔر۔ سی یو پی یَن کوٚر جرمن سلطنتس سٕتی اتحاد سِفارتی تنہائی نِش بچنٕچ امید مَنٛز ییٚمی امٕکی حالیہ علاقٲیی نۄقصانَن مَنٛز اہم کردار ادا کوٚر۔ یَتھ پٲٹھی گٔی یہٕ مرکزی طاقتن ہٕنٛد طرفہٕ گۄڈنیُٛک عٔظیٖم جَنٛگَس مَنٛز شٲمل۔ اَتھ عرصس دوران روٗز سلطنت اختلافَس، خاص طور پؠٹھ عرب بغاوتس سٕتی جدوجہد تہٕ بیٚیہ آرمینیائی، اسوری تہٕ یونانین خَلاف نسل کشی کرنس مَنٛز مشغول۔

گۄڈنیُٛک عٔظیٖم جَنٛگہِ پتہٕ کوٚر فاتح اتحادی طاقتو سلطنت عثمانیہ پؠٹھ قبضہٕ تہٕ کٔرٕکھہ سلطنت تقسیم، ییٚمِہ کِن جۆنوٗبی علاقہٕ برطانیہ تہٕفرٛانٛسَس نِش روٗد۔ مقبوضہ اتحادین خٕلاف مصطفی کمال اتاترک سٕنٛز قیادتس مَنٛز کامیاب ترک جَنٛگ آزادی ہنٛد بٲعث بنیو اناطولیہ کس مرکزس مَنٛز جمہوریہ تُرکی ہُنٛد ظہور تہٕ ۱۹۲۲ مَنٛز عثمانی بادشاہت ہُنٛد خاتمہٕ، یمہٕ سٕتی سلطنت عثمانیہ گٔی رسمی طور پٲٹھی ختم۔

دولت علیہ عُثمانیہ
جھندٕ:
رۄقبہٕ:
1299-1922 (سلطنت) 1517-1924 (خلافت)
نعرٕ: دولت ابد مُدت
درجٕہ: سلطنت
رازدٲنی: سۆگٔت (1299-1331) اِزنِک (1331-1336) برسا (1336-1363) اِدِرنے (1326-1453) قُسطنتنیہ(أزیُٚک استانبل) (1453-1922)
سُلطان: عثمان غازی 1299-1326 (گوڈنیُٚک) مَحمَد سادِس 1918-1922 (أخری)

تٲریخ