2025 دِلہِ منٛز گاڑِ ہُنٛد دھماکہٕ

2025 دِلہِ منٛز گاڑِ ہُنٛد دھماکہٕ
حِصہٕ ہِندوستانس منٛز دہشت گردی
مُقام	Lal Qila metro station، دِل، ہِندوستان
نۄقطہٕ	28°39′22″N 77°14′09″E
تٲریٖخ	10 نَوَمبَر 2025
نِشانہٕ	شٔہری
حملٕچ قٕسٕم	گاڑِ بَم دھماکہٕ، دھماکہٕ، دہشت گردانہٕ حَملہٕ
ہلاکتہٕ	13
زخمی	30
اپرٲدی	تفتیٖش منٛز
مقصد	تفتیٖش منٛز

10 نَوَمبَر 2025 ہِنٛدُستانس مَنٛز دِلہِ مَنٛز لال قِلعہٕ میٹرو سٹیشنَس نزدیٖک اَکھ گاڑِ دھماکہٕ یَتھ مَنٛز کم از کم دَہ نفر ہَلاک تہٕ باقٕی ژوٚوُہ زخمی گٔیہِ۔ دِلہِ پُلسَس مُطٲبِق، دھماکُک وجہ چھُنہٕ معلوٗم، ییٚمہِ سٟتؠ گاڑِ تہٕ آٹو رکشہٕ ہؠتھ واریاہَن نزدیٖکی گاڑؠن نۄقصان گوٚو۔

دِلہِ مَنٛز کٔر پُلیسَن تحقیٖقات کِس حصہٕ پٲٹھؠ دہشت گردی خٕلاف قونوٗن (یَتھ مَنٛز غٲر قونوٗنی سرگرمیہِ (روک تھام) ایکٹ) اِستِمال، حالانٛکہِ یہِ چھُنہٕ سرکٲرِ طور زٲنِتھ مٲنِتھ یا دہشت گرد حملہٕ آسنٕچ تصدیٖق سپٕزمٕژ۔ دِلہِ پُلیٖسٕکہِ اِبتِدٲیی تٔحقیٖقات سٟتہِ چھُ پتہ لگان زِ لال قِلعہٕ کِس احاطس نزدیٖک ہؠکہِ زِیٛادٕ شُدَت وول دھماکہٕ فِدائین (خۄدکُش) حملہٕ ٲسِتھ۔

پس منظر

حملہٕ کہِ صُبحٲے کوٚر جموں و کشمیرَس مَنٛز پُلیسَن اتر پردیش پُلیسَس سٟتؠ سہکٲری مَنٛز اعلان زِ تِمَو چھُ دِلہِ سٟتؠ نکھٕہ أکِس شَہَر، فرید آبادَس مَنٛز أکِس کارروٲئی دوران دھماکہٕ خیز مواد، کیمیکل، رِجنٹ، ناروٗ مواد، تہٕ الیکٹرانِک سرکٹ شٲمِل تَقریٖبَن 2,900 کِلو دھماکہٕ خیز مواد برآمد کوٚرمُت۔

یہِ مواد اوس مبینہ طور دۄن مُجرِمن ہُنٛد تعلُق یِمَن ہٕنٛز پہچان جموں و کشمیر پُلیسَن پُلووم پؠٹھٕ مُزمِل احمد گنائی تہٕ قٲضؠ گُنٛڈ کِس عادِل مجید رٲتھٕر ناوٕ سٟتؠ چھِ اِلزام لگاونہٕ آمُت زِ تِم چھِ اِسلٲمی دہشت گرد گروپ، جیش محمد تہٕ انصار غزوتہ الہندَس سٟتؠ وابستہٕ أکِس "بین ریاستی تہٕ بین الاقوٲمی دہشت گردی ماڈیوٗلَس" ہُنٛد حصہٕ۔ فرید آباد، دھوجَس مَنٛز آو واریٛاہ ہتھیار ہیتھ 358 کِلو امونیم نائٹریٹ ضبط کرنہٕ آو۔ حالانٛکہِ دِلہِ مَنٛز چھُنہٕ پُلیسَن دۄن معاملَن تہٕ گاڑِ دھماکَس درمیان رٲبطُک اعلان کوٚرمُت کینٛہہ ۔

واقعہٕ

دِلہِ پُلسہٕ کٔمِشنَر ستیش گولچاہَن کوٚر اعلان زِ گاڑِ ٲس نہٕ پارک کٔرمٕژ۔ مگر ٲس اَکھ لوٚت پکن واجنہِ گاڑِ یۄس شامَس 6:52 بجہِ لال قلعہ میٹرو سٹیشن کِس گیٹ 1 نزدیٖک ٹریفک سِگنلَس پؠٹھ وۄزلہِ لایٹہِ پؠٹھ رُکاونہٕ ٲس آمٕژ، سیکنڈ پتہٕ پھٹنہٕ برٛونٛہہ۔ گولچاہَن دِژ یہِ تہِ اطلاع زِ دھماکہٕ وِزِ ٲسہِ گاڑِ انٛدر سوار موٗجوٗد۔ مرکٔزی وزیرِ داخلہ اَمِت شاہَن کوٚر أکِس سرکٲری بیانَس مَنٛز تصدیٖق زِ یہِ گٲڑؠ ٲس ہنڈایی آیی 20۔

پُلیٖس تہٕ چشمہٕ دیٖد گواہو دِژ اطلاع زِ دھماکہٕ اوس سؠٹھاہ طاقتور تہٕ واریاہ شِدَتُک۔ اَمہِ کہِ اثرَن کوٚر بُنیٲدی کار پوٗرٕ پٲٹھہِ تباہ تہٕ فوری طور دِیُت تَقریٖبَن اَکھ درجن نزدیٖکی گاڑؠن نار۔ دِلہِ فایر سروسٕکہِ أکہِ اہلکارَن ووٚن زِ اَتھ دھماکَس تہٕ نارَس مَنٛز دٔدؠ کُل شےٚ گاڑِ، زٕ ای رِکشہٕ، تہٕ اَکھ آٹو رِکشہٕ ن۔ دھماکٕچ آواز آیہِ ہتہٕ بٔد میٖٹر دوٗر پؠٹھٕ بوزنہٕ، تہٕ نزدیٖکی عمارتَن ہٕنٛزِ دارِ گٔیہِ پھُٹِتھ۔ دِلہِ فایر سروسَن (ڈی ایف ایس) دِژ اطلاع زِ تِمَن آیہِ شامَس 6:50 پؠٹھٕ 7:05 شامَس درمیان واریاہ فون تہٕ سوٗزِکھ فوری طور 7 نار ٹینڈر۔ فائر سروسٕکؠ أکؠ اہلکارَن کٔر تصدیٖق زِ شامَس 7:29 بجے تام آو نار پوٗرٕ پٲٹھہِ قوبوٗہس مَنٛز اننہٕ۔

ہلاکتہٕ

13 نفرَن ہٕنٛدِ ہَلاک گژھنٕچ اطلاع آیہِ دِنہٕ، تہٕ کم از کم 20 زخمی گٔیہِ۔

تحقیقات

دھماکَس أنٛدؠ پٔکؠ علاقہٕ اوسُکھ بنٛد کوٚرمُت، ییٚلہِ زن فارنسک ٹیمو دھماکٕکہِ وجہہ ہٕنٛز تفتیٖش کٔر۔ ہِنٛدُستانٕکہِ نیشنَل سِکیورٹی گارڈ، تہٕ نیشنل انویسٹی گیشن ایجنسی آیہِ تحقیٖقاتٕچہِ ذِمہِ دِنہٕ ۔

تفتیٖش کَرن والؠو کوٚر مبینہ طور گاڑِ ہٕنٛز مٲلِکِیت پُلوٲمِس مَنٛز قٲیِم ڈاکٹر عمر محمدَس نِش، یُس مبینہ طور امی نیٹ ورکَس سٟتؠ تعلُق اوس یِمَن دھماکہٕ کہِ دۄہ سُلہِ فرید آبادَس مَنٛز دھماکہٕ خیز مواد تہٕ ہتھیار ہیتھ لبنہٕ آمُت اوس۔ ماننہٕ چھُ یِوان زِ گٲڑؠ ٲس چلاونہٕ برٛونٛہہ ترٛیٚیہِ گٲنٛٹہٕ کھۄتہٕ زِیٛادٕ وقتَس یادگارَس نزدیٖک پارک کٔرمٕژ، سی سی ٹی وی فوٹیج مَنٛز چھُ وٕچھنہٕ آمُت زِ کار ٲس دُپہرَس تَقریٖبَن 3:19 بجہِ سنہری مسجدَس (لال قعلَس نزدیک) نکھٕ پارکِنٛگ ایریاہَس مَنٛز دٲخٕل گژھان تہٕ شامَس تَقریٖبَن 6:48 بجے تام روٗزِمٕژ۔ لال قِلعہٕ دھماکہٕ کِس سِلسِلس مَنٛز چھِ زٕ نَفر دیویندر تہٕ سلمان حِراستَس مَنٛز نِنہٕ آمٕتؠ ۔ تِم چھِ ہنڈایی آیی 20 گاڑِ ہٕنٛدؠ مٲلِک یَتھ مَنٛز عمر سٕنٛدِ طرفہٕ ہینہٕ برٛونٛہہ دھماکہٕ گوٚو۔

دِلہِ پُلسٕچ اِبتِدٲیی تحقیقاتَن چھُ یہِ دھماکہٕ فدائین (خۄدکشی) بم حملہٕ قرار دِیُتمُت۔

ردِعمل

گریلوٗ

سرکار

واقعہٕ پتہٕ آیہ دلہ، مذہبی مقامن تہٕ اتر پردیش تہٕ مہاراشٹر مَنٛز حفاظت بڑاونہٕ۔

ؤزیٖر اعظم نَرینٛدر مودیَن پُرٛژھ فورَن اَمہِ واقعَس مُتلِق۔ تٔمؠ کٔر مرکزی وزیر داخلہ امِت شاہس سٟتؠ فونس پؠٹھ کَتھ باتھ، پوٗرٕ صورتحالٕچ تفصیٖلی معلوٗمات حٲصِل کٔرٕن تہٕ کوٚرُن امیُک جٲیزٕ۔ پتہٕ کٔر تٔمؠ ایکس پؠٹھ أکِس پوسٹَس مَنٛز مرن والؠن ہِنٛدؠن عیالَن سٟتؠ تعزیتُک اظہار تہٕ زخمیَن ہٕنٛز جلد صحت یابی ہٕنٛز خواہش کٔر۔ وونہِ گو٘ ، أمہِ کوٚر نہٕ پنُن بھوٗٹان دورٕ رد ، یَتھ پؠٹھ واریاہَن مُشٲہِدٕ کَرن وٲلہِ تَنقیٖد کران چھِ ۔

مرکٔزی وزیرِ داخلہ امِت شاہ، ییٚمؠ سٕنٛدِس وزارتس تحت دِلہِ ہُنٛد امن و امان چھُ، کٔر ذٲتی طور صورتحالٕچ نگرٲنی شروٗع۔

سیٲسی

لوک سبھایہ مَنٛز حزب اختلافک رہنما راہول گاندھی ین ووٚن دھماکہٕ "انتہٲیی دل دہٕل کرن وول تہٕ تشویش ناک"۔

دلہ ہنٛدؠ برونٛہِم وزیر اعلی تہٕ عام آدمی پارٹی ہنٛد کنوینر اروند کیجریوال کوٚر تبصرٕ ز یہِ واقعہٕ چھ "انتہٲئی خطرناک"۔

بین الاقوامی

دھماکہٕ پتہٕ اوس واریاہَن مُلکَن تہٕ بین الاقوٲمی تنظیٖمَن ہٕنٛدیو نمایندَو تعزیتی تہٕ یکجہتی ہُنٛد اِظہار کوٚرمُت۔ ارجنٹائن، بھوٗٹان، مصر، یورپی یونین، فرانس، ایران، جاپان، مالدیپ، سری لنکا، تہٕ برطانیہن کوٛر مُتٲثرین تہٕ یمن ہنٛدین خاندانن سٟتؠ ہمدردی ہنٛد پیغامات پیش۔ ریاست ہائے متحدہ امریکہ کہ سفیرن وۆن ز سہ چھ صورتحالس قریب سان نگرٲنی کران تہٕ دتُن دلہ مَنٛز پننؠن شہرین مُتٲثِر لد علاقن نش بچنہٕ ہنٛز صلاح۔ روٗسی سفارت خانہ دژ یہِ جانچ کرنٕچ اطلاع ز کیا امیُک کانٛہہ شہری چھا مُتٲثر۔