کۆزاک
کۆزاک یا کَزاک (روٗسی: казак، اُکرٛایِنی: козак)، تُرکی قَزَق ("آزاد شَخٔص") پؠٹھٕ، یعنی کانٛہہ نَفَر یُس کرٛیٚہنِس سۆدرَس تہٕ خزر سۆدرَس نِش روزن والؠن اَکہِ قٕسمٕکؠن لوٗکَن ہُنٛد حِصہٕ آسہِ۔ یِمَن لوٗکَن خٲطرٕ اوس خۄد مۄختار روزُن رِواجُک حِصہٕ، تہٕ ٲخٕر پرٛٲوِکھ روٗسی حۆکوٗمتَس نِش خاص حۆقوٗق جَنٛگی خٔذمَتھ دِنہٕ کِس انعامس مَنٛز۔
تَوٲریٖخ
[اؠڈِٹ]گۄڈٕ، ۱۵مہِ صٔدی مَنٛز اوس یہِ لَقَب تِمَن اَڈٕ-خۄد مۄختار تاتار گُروہَن خٲطرٕ اِستِمال کرنہٕ یِوان یِمَو پنُن پان دنیپٕر علاقَس مَنٛز اوس قٲیِم کوٚرمُت۔ ۱۵مہِ صٔدی ہٕنٛدِس ٲنٛتَس تام اوس یہِ لَقَب تِمَن سَرفَن (رَعیَتَن) تہِ لۆگمُت یِم پولینٛڈٕ، لِتوانیٛا، تہٕ مۆسکوویٛا پؠٹھٕ ژٔلِتھ دۆن تہٕ دنیپٕر علاقَس مَنٛز ٲسؠ آزاد، خۄد گَردان، لَشکٔری سَماج بنٲوِتھ بَسےمٕتؠ۔
۱۶مہِ صٔدی مَنٛز ٲسؠ شےٚ بٔڈؠ کۆزاک لَشکَر: دۆنُک، گرٛیٚبینُک، یَیِکُک، وولگایہِ ہُنٛد، دنیپرُک، تہٕ زاپورِجیٛاہُک.
۱۶مہِ صٔدی ہٕنٛدِس گۄڈٕنِکِس حِصَس مَنٛز لٲگؠ پولینٛڈی پادشاہَو زاپورِجیٛاہٕکؠ کۆزاک لَشکٔری کالونی یَن مَنٛز تَبدیٖل کَرٕنؠ، پولینٛڈٕچَن سرحدن رٲچھدٔری کَرنہٕ خٲطرٕ۔
پوٗرٕ ۱۶مہِ صٔدی مَنٛز، تہٕ ۱۷مہِ صٔدی ہٕنٛدِس گۄڈٕنِکِس أڈِس مَنٛز تھٲو یِمَو کۆزاکَو پَنٕنؠ سِیٲسی آٹونومی برقرار، تہٕ کینٛژَس کالَس بَنٲوٕکھ اَکھ اَڈٕ-خۄد مۄختار رِیاستھ، بۆہدان خمیٚلؠنِژؠکی یَس (اُکرٛایِنی: Вогдан Хмельницьки) تَل (تَقریٖبَن ۱۶۴۹). پولینٛڈی تسلطس کھوٗژِتھ کۆر زاپورِجیٛاہٕکؠو کۆزاکَو روٗسَس سٟتؠ مۄعٲہِدٕہ، ۱۶۵۴س مَنٛز، ییٚمہِ تَحَت تِہٕنٛز سِیٲسی آٹونومی ٲس بَرقرار تھاونہٕ یِنؠ۔ روٗسی یَو تہِ کٔرؠ کۆزاک گۄڈٕ روٗسی سرحدن ہٕنٛدؠن مۄحٲفِظن ہٕنٛدؠ پٲٹھؠ، تہٕ پتہٕ شاہَنشٲہی پھٲلاوٕ کؠن بُتھؠ مؠن رٲچھدَرن ہٕنٛدؠ پٲٹھؠ۔
أنٛدریُٛم حال اوس یُتھ زِ کۆزاکَن اوس آزٲدی یَن ہُنٛد اَکھ زیٛادٕ بۆڈ درجہِ روٗسَس تل دِنہٕ آمُت۔ پولینٛڈی یَن تہٕ تُرکَن سٟتؠ کَتھ باتھ کَرنہٕ خٲطرٕ اوس کۆزاکَن روٗسی اِجازتھ ضۆروٗرَتھ، تِکیٛازِ یِمَن دۄن سٟتؠ ٲسؠ روٗسی تعلُقاتھ واریٛاہ نوزُکھ۔ امہِ علاوٕہ، کۆزاک لَشکَرُک سردار-حُکُمران، ییٚمِس ہیٚتمان ٲسؠ وَنان، اوس آزاد خٲرجی پالِسی ہٕنٛدؠن معاملن مَنٛز۔ یِتھٕ پٲٹھی، کینٛہہ جَنٛگی فَرٕض تُلِتھ، پرٛٲو تِمَو بیٚیہِ پَنٕنؠ آزٲدی، أکِس حَدَس تام، کَمَس کالَس۔ یِنہٕ والؠن ؤرؠ یَن مَنٛز بَڈیٚے روٗسی تسلط کۆزاکَن پؠٹھ۔
روٗسی ژھایہِ تَل پھٲلیٚے کۆزاک دۆن علاقس مَنٛز پنہٕ نہِ وَطنہٕ پؠٹھٕ مشرِقس کُن، تہٕ سُلی أنؠ تِمَو سِبِرؠ (سایِبیریٛا) اِستعمارس تَل۔ پٔزؠ پٲٹھؠ بَنیَٛو کۆزاک سَردار ییٚرماک تِمۆفیییٚوِچ (روٗسی: Ермак Тимофеевич) اَکھ لوٗکہٕ-ہیٖرو تَتھ علاقَس پؠٹھ قبضہٕ کَرنَس مَنٛز اَکھ بۆڈ کِردار آسنہٕ باپَتھ۔ ۱۹مہِ صٔدی ہٕنٛدِس ٲنٛتَس تام اوس کۄزاک گُروہَن ہُنٛد تعداد بٔڈِٹھ ۱۱ گۆمُت، یِمَن مَنٛز شٲمِل ٲسؠ دۆنٕکؠ، کُبانیہِ ہٕنٛدؠ، تیریٚکٕکؠ، اۆریٚنبوٗرگٕکؠ، تہٕ اُسوٗری یِکؠ۔
ییٚلہِ تِہٕنٛدؠ خاص حۆقوٗق خطرس مَنٛز آے، کۆزاکَو کٔر بغاوت، تہٕ تِہٕنٛدؠ سارِوٕے کھۄتہٕ مۆشہوٗر قٲیِد ٲسؠ ستینؠکا رازِن، کۆندرَٛتی بُلاوِن، تہٕ ییٚمیٚلؠیان پُگَچوف. دۆیِمِس شُمٲلی جَنٛگَس مَنٛز دِتؠ ہیٚتمان اِوان مَزیپاہَن ۵,۰۰۰ کۆزاک سِپاہ سویٖڈنہٕ کِس بادشاہَس، یَس ناو اوس کارل ۱۲. نٔتیٖجہٕ اوس یہِ زِ وارٕ-وارٕ رٲو تِمَن سٲرٕے آٹونومی۔ ۱۸مہِ صٔدی ہٕنٛدِس پَتہٕ کِس حِصَس تام ٲس وٲجِب گٔمٕژ سارِنٕے کۆزاک مَردَن پؠٹھ ۲۰ن ؤرؠ یَن ہٕنٛز روٗسی فوجَس مَنٛز خٔذمَتھ۔ کۆزاک گام (ستَنیٖژا) ٲسؠ توتہِ پَنٕنؠ مجلِس پانَے ژاران، مگر ہیٚتمان ٲس مرکزی حۆکوٗمَتھ مُقرَر کَران۔ کۆزاکَن ہٕنٛز معاشرتی ساخٕتھ، یۄسہٕ رِواجہٕ مُطٲبق بروبری تہٕ اِجتمٲعی زٔمیٖن دٲری پؠٹھ ٲس بٔنِتھ، تہِ گٔے خراب، خاص کٔرِتھ ۱۸۶۹ پَتہٕ، ییٚلہِ کۆزاک اَفسَرن تہٕ سرکٲری مُلٲزِمَن دیُٛتُکھ نِجی زٔمیٖن تھاونُک تہٕ نیٚبرِمؠن کٕنہٕ نُک حَق۔
۱۹مہِ تہٕ ۲۰مہِ صٔدی یَن مَنٛز کۆر روٗسَن یِہُنٛد ٲنٛتہٕ رۆس اِستِمال جَنٛگی کارَن تہٕ انقلٲبی حرکژ دباونس مَنٛز۔ روٗسی خانہٕ جَنٛگی (۱۹۱۸-۱۹۲۰) مَنٛز ٲسؠ کۆزاک پھُٹِتھ۔ یِم جۆنوٗبَس مَنٛز ٲسی، بَنیٚے تتہِ سفید فوجن ہُنٛد بُنؠیاد، تہٕ تَقریٖبَن ۳۰,۰۰۰ ژٔلؠ روٗس ترٛاوِتھ، سفید فوجن سٟتؠ۔ سوٚویت حُکُمرٲنی مَنٛز راورٲو کۆزاک معاشرو پَنٕنؠ پوٗرٕ اِنتِظٲمی طاقَتھ۔
أزیُٛک زَمانہٕ
[اؠڈِٹ]۲۱مہِ صٔدی مَنٛز، صَدٕر ولادِمِر پوٗتِنَس تَل لۆگ کۆزاکَو بیٚیہِ پنُن تَوٲریٖخی رِشتہٕ ماسکَوَس سٟتؠ۔ کۆزاک اِمدادی یَو بنوو روٗسی مقٲمی پُلیٖس مظبوٗط، خاص کٔرِتھ سوچی ۲۰۱۴ اۆلِمپِک وَنٛدٕ گیمَن مَنٛز، مگر تِمن پؠٹھ ؤتھؠ کینٛہہ اِنسٲنی حۆقوٗقن سٟتؠ جُرِتھ اِضطراب۔
کۆزاک نیٖم-فوٗجی گُروہَو لۆڈ روٗسی فوجَس سٟتؠ شانہٕ بہٕ شانہٕ ۲۰۰۸س مَنٛز گُرجِستانَس (جارجیٛاہَس) پؠٹھ حملس مَنٛز۔ تِمَو کٔر شۆموٗلیَتھ ۲۰۱۴س مَنٛز تہِ، ییٚلہِ اُکرٛایِنایہِ ہٕنٛز (یوٗکرٛینٕچ) قِرِم (کرٛیٖمیٛا) آٹونومی-سٔژھ جۆمہوٗریَتھ روٗسی فوجی اِلحاقَس تَل آے، تہٕ پَتہٕ مشرقی اُکرٛایِنایہِ مَنٛز یۄسہٕ ہَتھیار دَر تٔحریٖکھ، تَتھ مَنٛز تہِ، یَتھ روٗسی حؠمایَتھ ٲس۔ [1]