کٲشرِس مَنٛز میننہٕ تولنٕکؠ پیمانہٕ

کأشرِس مَنٛز میننہٕ تولنٕکؠ پیمانہٕ

(i) رژھ : تولنس مَنٛز سارِوٕے کھۄتہٕ لۄکٹ پیمانہٕ۔

(ii) دٲنؠ : ٲٹھن رژھَن ہِنٛز گٔیہِ اَکھ دٲنؠ۔

8 رژھ = اَکھ دٲنؠ

(iii) ماشہِ : ماشہِ گو تَقریٖبَن اَکھ گرٛام۔

ماشہِ = گرٛام

(iv) تولہٕ : بہن ماشہِ ہِنٛز گو اَکھ تولہٕ۔

1 تولہٕ = 12 گرام

(v) پَل : ^3/5 3 تولن ہُنٛد گو اَکھ پَل

36 تولہٕ = 1 پَل

(vi) چھٹانٛگ : پانژن تولن ہُنٛد گو اَکھ چھٹانٛگ۔

5 تولہٕ = 1 چھٹانٛگ

(vii) پاو : ژۄن چھٹانگن ہِنز گٔیہِ اَکھ پاو۔

4 چھٹانٛگ = اَکھ پاو

(viii) سیر : ژۄن پاوَن ہُنٛد گو اَکھ سیر ۔

4 پاو = اَکھ سیر

(ix) أڈٕمٔنؠ : ساڑٕ 10 چھٹانٛگ گٔیہِ أڈٕمٔنؠ ۔

10.5 چھٹانٛگ = 1/2 مَنُٹ

(x) مَنُٹ یا مَن : ساڑھ پانژھ پاو گو مَنُٹ یا مَن ۔

5.5 پاوٕ = مَنُٹ یا مَن

(xi) دٕہر : ساڑھ داہ پاو گٔیہِ دٕہٕر ۔

10.5 پاو = دٕہر

(xii) پانٛزُو : دٕہر تہِ پانزو چھِ برابر۔

دٕہٕر = پانٛزُو

(xiii) ترٛکھ : پانژھ سیر تہِ پاو گو ترٛکھ ۔

ترٛکھ = پانژھ سیر تہٕ پاو یا 5 کلو

(xiv) کھار : شُراہ ترٛکھ گٔے کھار ۔

16 ترٛکھ = کھار

زمینس متعلق اِستِمال سپدُن وٲلؠ پیمانہِ

(Measurements used regarding land)

i- اوٚنگُل : پیٖژ جاہے اَکھ اوٚنگٕج رٹہِ۔

ii- گِراہ : اَکھ چپہٕ یا پانژن اوٚنگجن ہِنز جاے۔

iii- گَز : شُرہن گِرہن ہُنٛد گو اَکھ گَز۔

iv- پشمیٖنہٕ گَز : وُہن گِرہن ہُنٛد گو اَکھ پشمیٖنہٕ گَز۔

v- پیمٲیِش گَز : سُہ گَز یُس یُس زمینس مینہٕ نِکس سِلسِلس مَنٛز اِستِمال چھُ سپدان۔ یہِ چھُ ساڑ پانژھ فُٹ آسان۔

vi- جریٖب : 55 فُٹہٕ یا داہ پیمٲیشی گَز گٔے اَکھ جریٖب۔

vii- مرلہٕ : ترٛے مربع پیمٲیشی گَز گو اَکھ مرلہٕ۔

viii- سِرسٲے : مرلُک ترٛییِم حِصہٕ یا ^1/2 5 مربع فُٹ رۄقبہٕ گو اَکھ سِرسٲے۔

ix- کنال : وُہن مرلن ہُنٛد گو اَکھ کنالہٕ۔

x- أڈمٔنؠ : پانژھ مرلہٕ زمین گَیہِ أڈمٔنؠ۔

xi- مَنُٹ : 10 مرلَن ہُنٛد گو مَنُٹ۔

xii- پانزُو : دٔہ مرلہٕ زمیٖن گو پانزُو۔

xiii- ترٛکھ : دۄن کنالن ہُنٛد گو اَکھ ترٛکھ۔

xiv- کھار : شُرہن ترٛکھن چھِ ونان کھار۔

xv- ہور : ژور ترٛکھ یا اَکھ ایکڑ زمین۔

xvi- اَستہٕ : ٲٹھ گِرہاراد گو اَکھ اَستہٕ۔

دانہِ گاسُک مینہٕ تول

(Measurement weights for paddy straw/grass)

یُس دان زَنٛڈ اَتھس واتن تتھ چھِ ونان تھۄپھ۔

ژٔپھ : دۄن تھاپبن چھِ ونان ژپھ۔

لوو : دۄن ژپھن چھِ لوو بناونہٕ یِوان۔

گؠڈ : شؠن لاین ہِنز گَیہِ گؠڈ۔

کھوٚر : دۄن گیٚجؠن چھِ بناوان کھوٚر۔

ژاکھ : ژورن لاین چھِ بناوان ژاکھ۔