لینَکس

لینَکس

لوگو

عام مولوٗماتھ

ناو منسوٗبہٕ	Linux
پؠلیٹفارَم	فہرست ... DEC Alpha — x86 — x86-64 — ARM architecture — PowerPC — RISC-V — MIPS
اَصٕل ڈِوؠلپَر	Linus Torvalds

تَکنیٖکی مولوٗماتھ

پرٛوگرامِنٛگ زَبان	سی assembly language
گۄڈٕنیُک رِلیٖز	17 سیٚپٹَمبَر 1991

سِلسِلہٕ

اَصل / بُنیاد	Linux
اَثَر پیٛومُت	MINIX Unix

لینَکس (Linux) چھُ اَکھ اوپٕن سورس تہٕ مُفٕت آپریٹِنٛگ سِسٹَم یُس یوٗنِکس (Unix) پؠٹھ مَبنی چھُ۔ یہِ آپریٹِنٛگ سِسٹَم آو گۄڈٕنِچ لَٹہِ 17 سَتَمبَر 1991 مَنٛز لینَس ٹوروالڈٕزَن تَخلیٖق کوٚرمُت۔ یِتھ پٲٹھؠ ونڈوز (Windows) تہٕ میک او اؠس (macOS) چھِ آپریٹِنٛگ سِسٹَم، تِتھ پٲٹھؠ چھُ لینَکس تہِ اَکھ مَشہوٗر آپریٹِنٛگ سِسٹَم یُس کَمپیوٗٹَر ہارٛڈویٖرَس تہٕ سافٛٹویٖرَس دَرمِیان رٲبِطہٕ بَرقَرار تھاوان چھُ۔

تَوٲریٖخ

لینَس ٹوروالڈٕ

لینَکسٕچ شُرعات گٔیہِ 1991 ہَس مَنٛز ییٚلہِ فِنلینٛڈَس مَنٛز ہیٚلسِنٛکی یوٗنِوَرسِٹی ہِنٛدِس اَکِس طٲلِب عِلِم لینَس ٹوروالڈٕزَن اَکھ نۆو کَرنَل بَناونُک فٲصلہٕ کوٚر۔ تٔمؠ اوس گۄڈٕنِچ لَٹہِ یَتھ "فرٛیٖکس«Freax»" ناو دِتمُت، مَگَر پَتہٕ آو اَتھ لینَکس ناو تھاونہٕ۔ ییٚلہِ لینَکس کَرنَل گنوٗ (GNU) مَنصوٗبَس (یُس رِچَرٛڈ سِٹالمیٖنَن شۆروٗع اوس کوٚرمُت) سٟتؠ مِلٲوِتھ اِستِمال آو کَرنہٕ، تیٚلہِ بَنیو یہِ اَکھ مُکَمَل آپریٹِنٛگ سِسٹَم۔

اَہَم حِصہٕ

لینَکس سِسٹَمَس چھِ واریاہ اَہَم حِصہٕ آسان:

• بوٗٹلوڈَر (Bootloader): یہِ چھُ سُہ سافٛٹویٖر یُس کَمپیوٗٹَر چالوٗ گژھنہٕ وِزِ کَرنَلَس مؠموری مَنٛز اَنان چھُ۔

• کَرنَل (Kernel): یہِ چھُ لینَکسُک مَرکٔزی حِصہٕ یُس سی پی یوٗ (CPU)، مِموری تہٕ باقی ہَارڈویٖرَس سَنبھالان چھُ۔ اَتھ اَصٕل مَنٛز چھِ "لینَکس" وَنان۔

• ڈیسک ٹاپ اؠنوایرَنمیٚنٹ (Desktop Environment): یہِ چھُ سُہ حِصہٕ ییٚمہِ سٟتؠ صٲرِف (user) کَمپیوٗٹَرَس سٟتؠ کٲم چھُ کَران (مِثال گنوم GNOME، کے ڈی ای KDE)۔

اوپٕن سورس تہٕ لایسَنس

لینَکس چھُ جَنرَل پَبلِک لایسَنس (GNU GPL) تَحَت دِنہٕ آمُت۔ اَمیُک مَطلَب چھُ زِ کانٛہہ تہِ اِنسان ہیٚکہِ اَمیُک سورس کوڈ (source code) وُچھِتھ، اَتھ مَنٛز تَبدیٖلی کٔرِتھ، تہٕ یہِ باقؠن سٟتؠ بٲگرٲوِتھ۔ یِہوے وجہ چھُ وٲریاہَن کَمپَنیَن تہٕ رَضاکارَن ہُنٛد اَتھ مَنٛز بۄڈ حِصہٕ۔

مَشہوٗر قٕسٕم / تقسیٖم

لینَکس چھُنہٕ صِرِف اَکِس قٕسٕمَس مَنٛز دَستِیاب، بَلکہِ اَمیِکؠ چھِ وٲریاہ قٕسٕم یِمَن "ڈِسٹرو" (Distro) چھِ وَنان۔ کیٚنٛہہ مَشہوٗر لینَکس تقسیٖم چھِ:

• اوبُنٹوٗ (Ubuntu)
• فیڈورا (Fedora)
• لینَکس مِنٛٹ (Linux Mint)
• ڈیبِیَن (Debian)
• ریٚڈ ہیٹ اِنٹَرپرٛایِز لینَکس (Red Hat Enterprise Linux)

اِستِمال

اَزکَل چھُ لینَکس دُنؠ‌یاہَس مَنٛز سارِوٕے کھۄتہٕ زیٛادٕ اِستِمال گژھَن وول آپریٹِنٛگ سِسٹَم۔ دُنؠ‌یاہٕک تَمام بٔڑؠ سُپَر کَمپیوٗٹَر تہٕ وؠب سَروَر (web servers) چھِ لینَکسَس پؠٹھ کٲم کَران۔ اَمہِ اَلاو، دُنؠ‌یاہُک سارِوٕے کھۄتہٕ مَشہوٗر موبٲیِل آپریٹِنٛگ سِسٹَم اینٛڈرویِڈ تہِ چھُ لینَکس کَرنَلَس پؠٹھ مَبنی۔ سمارٛٹ ٹی وی، راوٗٹَر تہٕ باقٕے اؠلیکٹرٛانِک چیٖز تہِ چھِ لینَکس اِستِمال کَران۔