فریدالدین عطار

عطار سنز تصویر، حُسین بھزاد ، 1960

شیخ فریدالدین عطار نیشابُوری، ییمہ سُنٛد پُورہ ناو ابوحمید ابن ابوبکر ابراہیم چھُ، اوس نیشابُور، ایرانُک اَکھ صُوفی، فارسی شٲعر تہٕ تذکرہ نویس ییمؠ فارسی عٲرفانہ شٲعری پؠٹھ بوٚڈ اثر تروو۔ عطارن لیُوکھ واریاہ کلام عرفانس تہٕ تصوُفس پؠٹھ، یَتھ مَنٛز منطق الطیر تہٕ تذکرت الاولیا ساروٕے کھۄتہٕ مشہُور چھ۔

زندگی

عطارنہِ زندگی مُتعلق چھُ کم کیژھا واضح پٲٹھؠ ننان، تہٕ باقی سارنٕے اولیاہن ہندؠ پٲٹھؠ، یمن ہِنٛز لُو کن پژھ ٲسؠ، عطار تہٕ چھُ نیم داستانوی کردار بنیوومُت۔

عطار زاو بہؠ مہ صدی ہندس وسطس مَنٛز نیشا بُورِ (قیاس کنؠ چھ 1146ع تہٕ 1158ع زٕ ڈیٹ یوان ماننہ)۔ پیشہ کنؠ اوس عطر کنان (یُس ایمہ سند تخلص کنؠ تہٕ ننان چھُ) عطار اوس اکس کیمیادان سُنٛد نیچیوٚو تہٕ پننس مٲلس نش ہیچھن واریاہ علُوم۔ یۆدوے پننین ادبی کامین مَنٛز عطار پانس مُتعلق کینہہ چھُن لیکھان، مگر یہِ چھُ ظٲہر کہ سُہ اوس اَکھ طبیب تہٕ عطر کٕنان۔ وننہ چھُ یوان ز عطارس نش یون وٲلؠ بؠمار ٲسؠ تیمس پننؠ سختی، عصایب تہٕ رُوحٲنی تکلیفہ باوان، تہٕ ییمہ سٟتؠ عطارنہ فکرِ بۆڈ اثر پیۆو تہٕ ییمہ کنؠ تیمؠ پنُن کاربار ترٲیتھ ژھُن تہٕ دراو سفرس (بغداد، بصرہ، کوفہ، مکہ، مدینہ، دمشق، خوارزم، ترکستان تہٕ ہندُستان)۔ واریاہن صُوفین سٟتؠ مُلاقات کٔرِتھ بدلیٲی ایمس بیٚیہِ سونچ تہٕ عطارن تہٕ کٔر تصوُفٕچ وتھ اختیار۔

جدید نقاد چھن اَتھ کتھ مانان کہ عطار کیا اوس صُوفی تہٕ سُہ کیا دراو سفرس۔ تم چھ ونان ز عطارٕنؠ تصنیفہ چھ محض "ایپرسییشن"، یا ادبی ریوایتن ہُنٛد تقلید، تہٕ اَتھ رایہ زُور دنہ مُوجُوب چھ تیم عطارنہ منطق الطیرس مَنٛز اکس شعرس کُن اشارہ کران ز "عطار دراو نہ باقین طایرن سٟتؠ سفرس ۔۔۔"

عطار مُود 1220ع اُکُن یُکُن، شاید ایمہ مُوجُب ز مۄنگولو کوٚر شُمال-مشرقی ایرانس پؠٹھ حملہ۔ ایمہ سُنٛد مزار چھُ نیشابُوری ایستادہ۔

عطارنس مرنس پؠٹھ چھ اَکھ مشہُور حکایت یۄس ایمسندس فقرس کُن اشارہ چھ دیوان:

ییلہ نیشابُورس پؠٹھ مۄنگولو حملہٕ کۆر، عطار آو غُلام بناونہ۔ اکؠ شخصن ہیژیاو منگولن ساس چاندہ ہندؠ دیار دؠتھ عطار رہا کرُن، مگر عطار کٔر فریاد ز تیمؠ سنز قٟمتھ چھ ایمہ کھوتہ گراں۔ منگولو کٔر یہِ پیشکش رد ایمہ غرضہٕ ز تیمن میلہ ایمہ کھوتہ بۆڈ معاوضہٕ۔ ایمہ پتہٕ آو اکھ شخص ییمؠ عطار ایکہ گاسہ لای بدلہِ رہا کرُن ہیۆت، یتھ پؠٹھ عطارن وۆن ز میٲنؠ قٟمتھ چھُ یٕژٕے، أتھؠ قٟمتس پؠٹھ گژھین میون فروخت، یتھ پؠٹھ مۄنگولن ہندس زیٹھِس جہل کھۆت تہٕ تیمؠ کۆر عطارس کلہ قلم۔

تصنیفہ

عطارن لیچھ پننہ زندگی مَنٛز یم کتابہ:

• منطق الطیر یا مقالات الطیور۔
• تذکرۃ الاولیا
• اسرار نامہ
• پند نامہ
• دیوان
• الہی نامہ
• شرح القلب