علم تفسیر

علم تفسیر (عربی:فسر، یعنی کھولُن) چھ تتھ دینی علمس ونن یَتھ مَنٛز قرآنُک معنی، حکم تہٕ حکمژ کھُولتھ واضیح ین کَرنہٕ۔ اَتھ مَنٛز چھ فقہ ، بلاغت تہٕ عربی لسٲنیتکؠن مسلن ہٕنٛز باوتھ آسن کَرنہٕ آمژ۔ تفسیر کرن وٲلس چھ مفسر ونان۔

تفسیر ابن کثیر

تٲریخ

رسُول اللہ ٲسؠ نہ صرف صحب صٲبن قرآنکؠ حرف ہیچھناوان بلکہ ٲسؠ تم تیمن امیُک مکمل تفسیر بیان کران(اوَے لۆگ بعض صحب صٲبن اَکھ سُورہ ہیچھنس واریاہ کال)۔رسُول اللہ تہٕ صحابن ہِنٛز وفات لبنہ پتہ آی اُمتس یہِ ضرورت پیش ز یہِ ییہ مستقل علمچہ صُورتہ مَنٛز محفُوظ کَرنہٕ، یُتھ نہ قرآنکس معنہس برۄنہہ کُن کانٛہہ تعریف ییہ کَرنہٕ۔

تفسیرکؠ سر چشمہ

قرآنُک تفسیر ہؠکو ژورو ذرؠ یو بیان کٔرِتھ:

اکثر چھُ بعض آیہ کریمن ہُنٛد مفہُوم قرآنچی کُنہ دیگر آیتہ مَنٛز نیران، توَے چھُ گۄڈ قرآن کہ ذرؠ یے قرآنُک تفسیر بیان کرنچ کُوشش یوان کَرنہٕ۔ دۄییم درجہ چھُ ایمہ پتہ حدیثن تہٕ سُنتس ۔ صحب صٲبن ہندؠ قول چھ ترییم درجہ تھاوان، چُونکہ صحب صٲبو ہیۆچھ رسُول اللہس نشہ قرآن۔ اَمہِ پتہ چھ تابعینن، یعنی اسلامچ دۄییم پیر، ہندؠ قول، یمو صحب صٲبن نش ہیۆچھ قرآن ۔ اد چھ پتہ کٲنسہ مفسر سُنٛد پنُن تدبر تہٕ اجتہاد، بشرطیکہ سُہ آسہ نہ قرآن تہٕ حدیثس خَلاف۔

اسرٲیلیت

اسرٲیلیت چھ اہل کتابن (یہُودؠ تہٕ عیسٲی) ہِنٛز ریوایژ یم پرانؠن تفسیرن مَنٛز او مُوجُوب دٲخل سپز تکیاز کینہہ صحب صٲب ٲسؠ گۄڈ اہل کتابو مَنٛز، اسلام قبُول کَرنہٕ پتہ ٲسؠ تیم سمجان کہ اسلامٕچ تہٕ اہلہ کتابن ہِنٛز تٲریخ چھ کُنی۔ اَتھ چھ تریہ قسم:

تم ریوایژ یم قرآن تہٕ سُنت پؠٹھ ثٲبت چھ، تہٕ امن پؠٹھ ایمان انُن چھُ لٲزم۔ مثال فرعون سُنٛد غرق گژھُن۔

تم ریوایژ یمن قرآن تہٕ سُنت رد چھُ کران، تہٕ امن تکذیب کرُن چھُ لٲزم۔ مثال، یہُودؠ چھ ونان کہ حضرت اسماعیل سند بدلہ آییاو حضرت اسحاق ذبح کَرنہٕ۔

تم ریوایژ یمن قرآن تہٕ حدیث تصدیق چھ کرن نہ تکذیب، عٲلم چھ امن معاملن پؠٹھ نہ ایمان انس، تہٕ نہ انکار کرنس بہتر زانان۔

مشہُور تفسیر

• تفسیر ابن جریر
• تفسیر ابن کثیر
• تفسیر القرطُبی
• تفسیر کبیر
• احکام القرآن للجصاص
• تفسیر رُوح المعانی
• تفسیر معارف القرآن

کٲشر زبانہ مَنٛز:

• بیان الفرقان
• تفہیم القرآن (ترجمہ کار اطہر مانیگامی)