خلافتِ راشِدہ

خلافتِ راشِدہ ٲس اِسلٲمی نبی محمد ﷺ سٕنٛز جاے نِنہٕ واجیٚنی گۄڈٕنِچ خلافت۔ اَتھ پؠٹھ ٲس 632 عیسوی مَنٛز محمد ﷺ سٕنٛدِ مرنہٕ پتہٕ محمد ﷺ سٕنٛدٮ۪و گۄڈٕنِکٮ۪ن ژۄن خلیفن ہٕنٛز حوٚکوٗمَتھ۔ پننِس وجودس دوران ٲس سلطنت مغربی ایشیا تہٕ شمال مشرقی افریقہس مَنٛز ساروٕے کھۄتہٕ طاقتور معاشی، ثقافتی تہٕ فوجی طاقت۔

خلافت گٔیہِ جون 632 ہَس مَنٛز محمدﷺ سٕنٛدِ انتِقال نِنٕہ تہٕ امہِ پتہٕ أمہِ سٕنٛزِ قیادتس مَنٛز جانشینی پؠٹھ بَحَژ پتہٕ پٲدٕ۔ بنو تیم قبیلُک محمدﷺ سُنٛد قریبی صحابی ابو بکر آو مدینس مَنٛز گۄڈنیُک خلیفہ منتخب کرنہٕ تہٕ تٔمی کوٚر جزیرہ نما عرب فتح کرنُک آغاز۔ أمہِ سُنٛد مۄختصر دورِ حُکوٗمت گوٚو اَگَست 634 ہَس مَنٛز تَمہِ وِزِ ختٕم ییٚلہِ سُہ موٗد تہٕ أمی سٕنٛدِ پتہٕ آو بنو آدی قٔبیٖلُک أمہِ سُنٛد مُقرر وٲرِث عمر خلٲفٕہ مُکرَر کرنٕہ۔ عمرس تحت، خلافت پھٔلییہٕ وارَیاہ تیزی سان۔ عمرن اۆن بازنطینی سلطنتُک زٕ تِہائی کھوتہٕ زیٛادٕ تہٕ تَقریٖبَن پورٕ ساسانی سلطنت خِلافتٕکِس پر چمَس اندر۔ عمر آو نَوَمبَر 644 ہَس مَنٛز قَتٕل کرنہٕ تہٕ أمی سٕنٛدِ پتہٕ آو بنو اُمییا قٔبیٖلُک اَکھ فرد عثمان عمر سٕنٛدِ طرفہٕ شیٚن نفرن ہِنٛزِ کمیٹی ہِنٛدِ ذٔریعہٕ خٔلیفٕہ مُقرَر کرنہٕ۔ عثمان سٕنٛدِس دورس مَنٛز کٔر خلافتن 651 ہس مَنٛز فارس پیٚٹھ مکمل فتح حٲصل تہٕ بازنطینی علاقن مَنٛز تھاوٕکھ مُہِم جٲری۔ أمہِ سٕنٛدِس دورِ حُکوٗمتَس مَنٛز گٔیہِ بغاوت، تہٕ سُہ آو جوٗن 656 ہَس مَنٛز قتٕل کرنہٕ۔

ایٚمِہ پتٕہ آو بنو حاشم قبیلُک اکھہ فرد علی خلیفہٕ مُقرر کرنٕہ، ییٚمی راز دٲنی کوفا منتقل کٔر۔ علیَن کٔر خانہ جنگی ہٕنٛز صدارت یَتھ 'گودنیُٚک فتنہ' ونان چھِ تکیازِ تیم سٕنز بالادستی ٲس عثمان سٕندی رشتہ دار تہٕ شام کہِ گوَرنَر معاوِیہ ابن ابو سفیان (دور۔ 661–680) کہِ ذریعہِ تسلیم کرنہٕ آمٕژ، یم سُند خیال اوس زِ عثمان سٕندِس قٲتلن گژھہِ فوری سزا دِنہٕ یُٚن۔ اَمہِ علاوٕ کٔر أکِس ترٛیٚیِم جمٲژ یَتھ خوارجِی ناوٕ سٕتہِ زانٛنہٕ چھُ یِوان، یِم علی سٕنٛدِ سٲبقہٕ حٲمایتی ٲسہِ ، کٔر سِفِن کِس جنٛگس مَنٛز ثالثی قبول کرنہٕ نِش اِنکار کرنہٕ پتہٕ علی تہٕ معاویہ دۄشؤینٕی خٕلاف بغاوت۔ اَمہِ جنگٕکہِ وجہہ سٕتہِ گٔیہِ 661 ہَس مَنٛز معاویہ سٕنٛدِ دٔسی خلافتِ راشِدہ ختم کَرنٕہ تہٕ اُمایہ خلافت قٲیِم کرنٕہ۔ خانہ جنگہِ کٔر سُنی تہٕ شیعہ مسلمانن درمیان تقسیم مستقل طور پٲٹھی مضبوط، شیعہ مسلمانن ہُنٛد خیال اوس زِ علی چھُ محمدس پتہٕ گۄڈنیُٚک صٔحیٖح خلیفٕہ تہٕ امام ۔