بَحرِ روٗمی آب و ہَوا
بَحرِ روٗمی آب و ہَوا، کیٛوپن آب و ہَوٲیی ورگہٕ-بنٛدی ہُنٛد اَکھ بۆڈ وَرٕگ، چھُ زیٛادٕ تَر جَغرٲفیٲیی عرضن ہٕنٛدؠن ۳۰ پؠٹھٕ ۴۵ شُمٲلی تہٕ جۆنوٗبی درجن کُن لبنہٕ یِوان، تہٕ براعظمن ہٕنٛدؠن مغربی سۆدرٕ-بَٹھؠن پؠٹھ۔ کیٛوپن-گایِگَر-پۆہل نِظامس مَنٛز چھُ یہِ Csa تہٕ Csb نِکہٕ-وَرگن مَنٛز بٲگرِتھ۔ Csc تہِ چھُ اَمؠ کُے اَکھ حِصہٕ، مَگر چھُ واریٛاہ کَم جاین موجوٗد۔
تَلہٕ-ٹرٛاپِکی اینٛٹی-سایِکلونہٕ کہِ قطبن کُن زیٹھنہٕ تہٕ سۆدرن پؠٹھ پھٲلنہٕ سٟتؠ چھُ یِمن علاقن کُن رؠتہٕ کالہِ بۄن وَسہٕ وُن ہَوا یِوان، ہیٚمہِ سٟتؠ صاف نَب تہٕ تژرٕکِس درجس مَنٛز تھَزر چھِ پٲدٕ سپدان۔ ییٚلہِ اینٛٹی-سایِکلون چھُ اِستواہَس کُن پَکان وَنٛدَس، تَمِچ جاے چھِ رَٹان پَکہٕ وٕنؠ مَحٲذی سایِکلون، یِہٕنٛدِ سٟتؠ آب چھُ وَشان (روٗدٕ یا شیٖنہٕ شکلہِ مَنٛز).
بَحرِ روٗمی آب و ہَوا چھِ اکثر أدرؠو تَلہٕ-ٹرٛاپِکی آب و ہَواہَو کھۄتہٕ ۂکھؠ آسان، ؤرؠ یُک درمیٲنی روٗدٕ تہٕ شیٖنہٕ تعداد چھُ زیٛادٕ تَر ۳۵۰ پؠٹھٕ ۹۰۰ مِلی میٖٹر رینٛجہِ مَنٛز آسان؛ سارِوٕے کھۄتہٕ کَم تعداد چھُ پؠوان أنٛدرٕمؠن علاقن مَنٛز، اَڈٕ-ہۄکھؠن اِستَپی آب و ہَواہن نِشہِ۔
اَتھ چھُ ناو پیٛومُت بَحرِ روٗمَس پؠٹھ۔[1]
تۆت-رؠتہٕ کٲلؠ بَحرِ روٗمی آب و ہَوا
[اؠڈِٹ]کیٛوپن آب و ہَوٲیی ورگہٕ-بنٛدی مَنٛز چھُ یہِ Csa اچھرو سٟتؠ ہاونہٕ یِوان۔ کُنہِ أکِس رؠتَس مَنٛز چھُ درمیٲنی تژرُک درجہِ ۲۲ درجہِ سؠلسیٖیَسہٕ کھۄتہٕ ژۆر آسان۔ Csa ہیٚکہِ مایِکرٛو آب و ہَواہٕکؠ پٲٹھؠ کُنہِ خاص As جایہِ بُلَنٛد تھَزرَس پؠٹھ تہِ موجوٗد ٲسِتھ، اگر تتہِ ہۆکھ رؠتہٕ کول آسہِ۔
یہِ آب و ہَوا چھُ اکثر بَحرِ روٗمَس أنٛدؠ-پٔکھؠ، جۆنوٗبی-مشرقی آسٹرٛیلیٛاہَس مَنٛز، جۆنوٗبی-مشرقی جۆنوٗبی اَفریٖقَس مَنٛز، مٔنٛزؠ مِس ایشیٛاکؠن کینٛژن علاقن مَنٛز، سیٖیَرا نیٚوادا پؠٹھٕ مشرِقس کُن جۆنوٗبی کیلِفارنیٛاکؠن أنٛدرٕمؠن علاقن مَنٛز بیترِ لبنہٕ یِوان۔[2]
وُشُن-رؠتہٕ کٲلؠ بَحرِ روٗمی آب و ہَوا
[اؠڈِٹ]یِم چھِ شِہُل-رؠتہٕ کٲلؠ بَحرِ روٗمی آب و ہَوا تہِ وننہٕ یِوان، تہٕ کیٛوپن ورگہٕ-بنٛدی مُطٲبِق Csb اَچھرو سٟتؠ ہاونہٕ یِوان۔ یِمَن چھُ سارِنٕے رؠتَن مَنٛز ۲۲ درجہِ بۄن تَژرُک درجہِ آسان۔ سۆدرَس مَنٛز تُرُن بَہاو، آبُک ہیٛۆر کھَسُن، تہٕ جَغرٲفیٲیی عرضن ہُنٛد تھَزَر چھِ اکثر یِتھِس شِہلِس آب و ہَواہس ذِمہٕ وار۔
یِم چھِ شُمٲلی-مشرقی اِبیریٛاہَس مَنٛز (زن گَلِسیٛا، تہٕ پُرتغالٕکؠ شُمٲلی علاقہٕ تہٕ مشرقی سۆدرٕ-بۆٹھ)، کیلِفارنیٛاکِس سۆدرٕ-بٔٹھِس پؠٹھ، پَسِفِک نارتھ-وؠسٹَس (سٲکِن شُمال-مشرقس) کُن، مٔنٛزؠ مِس چیٖلے یَس مَنٛز بیترِ لبنہٕ یِوان۔[3]
تُرُن-رؠتہٕ کٲلؠ بَحرِ روٗمی آب و ہَوا
[اؠڈِٹ]تُرُن-رؠتہٕ کٲلؠ بَحرِ روٗمی آب و ہَوا چھُ کیٛوپن ورگہٕ-بنٛدی مُطٲبِق Csc اَچھرو سٟتؠ ہاونہٕ یِوان۔ یِم چھِ مُشکل سانٕے لبنہٕ یِوان، چھٔکرِتھ تھَزِ بُلنٛدی ہٕنٛزؠن جاین مَنٛز، شُمٲلی تہٕ جۆنوٗبی امرٛیٖکاکؠن مشرقی سۆدرٕ-بَٹھؠن کُن، یِمَن أنٛدؠ-پٔکھؠ بۆنِمؠ علاقہٕ بَحرِ روٗمی ورگٕکؠ آسَن۔
شُمٲلی اَمریٖکاہَس مَنٛز چھِ یِتھؠ علاقہٕ اولِمپِک، کاسکیڈ، کلامَتھ، تہٕ سیٖیَرا نیٚوادا بالہٕ رینٛجَن کُن لَبنہٕ یِوان۔ ٹرٛاپِکی علاقن مَنٛز چھےٚ یِہٕنٛز اَکھ نایاب مثال ہَلؠکَلا بال، ہَوایی یَس مَنٛز۔
جۆنوٗبی اَمرٛیٖکاہَس مَنٛز چھُ یہِ آب و ہَوا آنٛدیس بالَن کُن لبنہٕ یِوان۔
کورسیٖکاہَس مَنٛز تہِ چھِ لۄکٕٹؠ علاقہٕ تھَزرَس پؠٹھ ییٚتؠتھ یُتھ آب و ہَوا چھُ۔[4]
حَوالہٕ
[اؠڈِٹ]- ↑ "Mediterranean Climate". Encyclopaedia Britannica.
- ↑ "Hot-Summer Mediterranean Climate (Csa)". SKYbrary Aviation Safety.
- ↑ "Warm-Summer Mediterranean Climate (Csb)". SKYbrary Aviation Safety.
- ↑ "Cold-Summer Mediterranean Climate (Csc)". SKYbrary Aviation Safety.