اِستَپی
اِستَپی یا سٹؠپ چھُ اَکھ ہۆکھ، گاسہٕ مٲدان آسان۔ یِم مٲدان چھِ معتدل آب و ہَواہَن مَنٛز لبنہٕ یِوان، ٹرٛاپِکی تہٕ قطبی قطبی علاقن منٛزٕباگ۔ معتدل علاقن مَنٛز چھُ اَکھ باسہٕ وُن موٗسؠمی بدلاو بوزنہٕ یِوان — وَنٛدٕ چھُ آسان تُرُن تہٕ رؠتہٕ کول وُشُن۔
اِستَپی چھِ اَڈٕ-ۂکھؠ آسان، یعنی ؤرؠ یُک کُل روٗدٕ تہٕ شیٖنہٕ تعداد چھُ ۲۵-۵۰ سؠنٛٹی میٖٹر آسان (۱۰-۲۰ آنٛچہِ). یوٗتاہ روٗد چھُ ژھۄٹؠن گاسَن خٲطرٕ سؠٹھاہ، مگر تھَدؠن گاسَن تہٕ کُلؠن ہٕنٛدِ کھَسہٕ خٲطرٕ نہٕ۔ گاسَن ہٕنٛدؠ واریٛاہ قٕسٕم چھِ کھَسان سٹؠپَن مَنٛز، مگر واریٛاہ کَم چھِ اَڈِ میٖٹرٕ کھۄتہٕ تھٔدؠ آسان۔
یُریشیٛٲیی اِستَپی
[اؠڈِٹ]دُنؠ یُک سارِوٕے کھۄتہٕ بۆڈ گاسہٕ مٲدان چھُ یُریشیٛٲیی اِستَپی۔ یہِ چھُ ہَنٛگٔری (مَجارِستان) پؠٹھٕ چیٖنَس تام پھٲلِتھ۔ ژھوٚرُے اِستَپی یا سٹؠپ لَقَب چھِ اکثر یُریشیٛٲیی اِستَپی یَسٕے دِوان، تیٛوٗت چھُ یہِ مۆشہوٗر۔
سفر تہٕ تِجارَتھ کَرنہٕ خٲطرٕ اوس یہِ سارِوٕے کھۄتہٕ ضۆروٗری وَتَو منٛزٕ اَکھ۔ اَمیُٛک سۆم علاقہٕ چھُ ایشیٛاہَس تہٕ یُروپَس منٛزٕباگ اَکھ کٲمِل وَتھ بَناوان۔ گُرؠو، کھَرَو، تہٕ ووٗنٛٹَو ہٕنٛدؠو کاروانَو کۆر یَتھ پؠٹھ ساسہٕ بۄدؠن ؤرؠ یَن سفر۔ سارِوٕے کھۄتہٕ مۆشہوٗر تِجٲرتی وَتھ یَتھ پؠٹھ چھےٚ پٲٹؠ وَتھ (اَنٛگریٖزی: silk road)، یۄسہٕ چیٖنَس، یُروپَس، تہٕ ہندوستانس ٲس جوران۔ ۲۰۰ ؤری عیٖسیٰ برٛونٛٹھ تام ٲس پٲٹؠ وَتھ پۄختہٕ گٔمٕژ، تہٕ از تہِ چھےٚ پٲٹؠ وَتہِ ہٕنٛزٕ کینٛہہ تِجٲرتی وَتہٕ استعمالس مَنٛز۔
۱۳مہِ صٔدی مَنٛز کۆر منٛگول سردار چَنٛگیز خانَن تَقریٖبَن پوٗرٕ یُریشیٛٲیی اِستَپی یَس پؠٹھ فتح۔ شَہسَوار سٟتؠ ہؠتھ زیٖنؠ تٔمؠ چیٖن، مٔنٛزیُٛم ایشیٛا، تہٕ خزر سوٚدرَس أنٛدؠ-پٔکھؠ زٔمیٖن، پنہٕ نہِ وَطنہٕ پؠٹھٕ نیٖرِتھ، یُس از مَنٛگولیٛا چھُ۔
سَوارکٲری فرہَنٛگ چھُ از تہِ یُریشیٛٲیی اِستَپی کؠن واریٛاہَن مقٲمی تٔہذیٖبَن خٲطرٕ ضۆروٗری، مغربی روٗسہٕ کؠو کۆزاکَو پؠٹھٕ منٛگول تٔہذیٖبہِ تام۔
باقٕے اِستَپی
[اؠڈِٹ]شُمٲلی اَمریٖکاکؠن عالیٰ مٲدانَن (گرٛیٹ پلینٛزَن) مَنٛز موجوٗد پرٛیری تہِ چھُ اَکھ اِستپی۔ یہِ چھُ عالیٰ مٲدانَن ہٕنٛدِس مغربی اَنٛدَس کُن، راکی بالَن ہٕنٛزِ روٗدٕ ژھایہِ مَنٛز۔ مُتحِد رِیاستو ہٕنٛزِ ٹؠکسَس رِیاستہٕ پؠٹھٕ چھُ یہِ اِستَپی کینڈاکِس ساسکاتچیٚوان صوٗبَس تام پھٲلِتھ۔ [1]